中環出更：楊華勇愛駒爆大冷奪冠
福建幫頭領、全國政協楊孫西同愛兒楊華勇嘅愛駒「財富之星」，表現向來麻麻，○八年七月贏過一次頭馬後，一直與冠軍無緣，上季最叻都係跑第三，直到前晚出賽快活谷，「財富之星」忽然神勇，爆大冷奪冠，獨贏彩金派一百五十六元，馬主獎金就有二十八萬五千元，認真和味。不過，楊孫西身在北京公幹，由愛兒華勇做代表入場拉頭馬。
「財富之星」已經七歲，但竟然贏第二名半個身位，證明寶刀未老。華勇拉頭馬後上到貴賓室表現好開心，話等父親回港後，一定要食餐飯好好慶祝吓！華勇坦言，近期頻頻入場，原本希望操fit呢匹馬，可惜匹馬表現令人心寒，但估唔到今次發揮得咁好，終於有機會再拉頭馬！
