中環出更：政商名人籌款樂韻送溫情
為內地貧困白內障患者重見光明嘅「健康快車」，大前日喺灣仔君悅酒店舉行周年晚宴，主題為「Starry Starry Night」，以閃閃夜空嘅燦爛星辰，向遙遠嘅貧困白內障患者送上溫情。當晚邀得恒隆地產董事總經理陳南祿（Philip）及國泰航空企業事務董事莊偉茵等人組成嘅「Young Once」樂隊演出，加上慈善拍賣，最後籌得逾二百三十萬元。
小吉獻唱《萬水千山總是情》
周年晚宴吸引好多政商界慈善名人捧場，創會主席方黃吉雯悉心打扮，風騷滿場飛與賓客打招呼。卓妮仲見到全國人大常委范徐麗泰、財經事務及庫務局局長陳家強夫婦、前立法會秘書長馮載祥夫婦、平機會主席林煥光、新光酒樓集團常務董事總經理胡珠、仁愛堂主席莊舜而等去捧場，當然仲有份上台表演嘅Philip同莊偉茵啦！
晚會除咗獲得多名善長及機構捐出名錶及靚紅酒供大會拍賣，仲設有點唱環節，最矚目係小吉聯同莊偉茵及莊舜而等人高唱阿姐汪明荃嘅首本名曲《萬水千山總是情》，莊偉茵唱到七情上面，交足功課，而彈電子結他嘅Philip就與樂隊做伴奏，彈得有板有眼，非常專業，將晚會氣氛推至高潮，博得全場熱烈掌聲！
當晚李錦記集團捐出一百一十五萬元，贊助四川省資陽市人民醫院成立白內障治療中心，香港圓玄學院則捐出九十五萬幾元為火車醫院更換儀器，而新世界集團主席鄭裕彤旗下嘅周大福亦捐出五十六萬元，加上捐畀晚宴拍賣嘅名貴首飾，彤叔真係善心滿瀉。
卓妮