「惡人屋」街坊個個怕
【本報訊】「嗰三個人（死者）好多時一齊喺邨內出入，行路擺吓擺吓咁，成日用粗口鬧人，個個都怕咗佢哋！」三屍命案引來居民議論紛紛，有居民坦言該單位為「惡人屋」，男戶主愛招呼陌生人回家，更常以粗言穢語喝罵住客，人見人怕。
道友梯間除褲啪針
據街坊透露，案發單位住有一名駝背男子，常聯同兩名男子在邨內流連，粗口橫飛，據知，他們愛在啟田商場一間快餐店「打躉」，食客及店員都大感厭惡。此外，男戶主常帶同一些陌生男子回家，經常在單位內吵鬧。
此外，近年邨內毒品問題猖獗，住客劉女士坦言﹕「見過有人喺梯間除褲啪針，搞到血淋淋」，更有人拍門向住客索錢買毒品，她已在門口擺放木棍防衞，以策安全。居民賴先生嘆謂：「成日都有癮君子匿喺樓梯，投訴過都冇用！」
觀塘區議員姚柏良表示，不時有人在屋邨吸毒或販賣毒品，去年三月警方便曾在邨內搗破毒窟，他會促請警方加強人手巡邏，打擊毒品罪案。房屋署發言人回應稱，若發現有人在房署轄下屋邨吸毒或進行毒品非法活動，署方會交由警方處理。