政情：鬍鬚曾歎茶 掛住點心妹

「何不食肉糜」

香港繁華背後，窮人生活搵朝唔得晚，社聯尋日發表統計數字，顯示香港窮人創一百二十六萬人新高，咁啱鬍鬚曾尋日喺網誌撰文，講「我的飲早茶至愛」，提到阿婆大嬸推點心車打工餬口嘅茶樓百態，但唔係同情基層打工仔嘅淒苦，而係附庸風雅，沉醉兒時上茶樓嘅美麗回憶，佢話點心妹變咗由大嬸推點心車、點心車變點心紙，送上枱嘅點心亦失去熱騰騰嘅色香味。

所以，佢上茶樓，都要光顧一間有點心車嘅，等佢可以睇啱至點，點心「籠籠熱辣辣」，又特別鍾意嗰度嘅蝦餃。

鬍鬚曾識食識歎，但佢有冇諗到，好多清苦學童連上茶樓都機會唔多，更遑論要揀有冇點心車。

喺現時貧富懸殊愈嚟愈嚴重嘅香港，無論點心妹定係酒樓大嬸都搵食艱難，唔該鬍鬚曾唔好再上演「何不食肉糜」鬧劇，刺激貧苦大眾嘅神經好唔好！