政情：黎棟國最啱過檔勞福局
喺菲律賓人質事件中表現出色嘅保安局副局長黎棟國，近日紅爆政治圈，連電台有新節目，亦邀請佢擔任首集嘉賓，黎Sir喺節目中畀主持人問到「香港最急需解決嘅問題係乜」？點知黎Sir唔係答校園驗毒，亦唔係答向日本發出外遊警示，而係話要解決貧富懸殊問題。
主持人好詫異，話月薪廿萬嘅黎副局點會明白民間疾苦，於是黎Sir忽然好似拍《霎時感動》咁，話平時開車都會見到低下階層嘅生活狀況，偶然會見到手推車上滿載紙皮嘅老人家，睇到佢心都酸埋，所以即使畀後面啲車係咁響號，黎Sir一於好少理，會保持慢駛，以免發生意外，難怪主持人都大讚黎Sir雖然進身上流社會，仍保持濃厚嘅人情味。
嘩，身為候任保安局局長大熱人選，黎Sir咁體恤民情，不但可以接李少光班，更大可撈過界，做勞工及福利局局長都得啦！