社署官僚開學津貼靠拖
社會福利署提早發放教育開支津貼（下稱開學津貼）與上網津貼，原為綜援家庭提供及時雨紓困。然而，開學至今仍有綜援戶得個吉，多番追問仍未落實發放日期。社署承認因個別家庭受覆檢續領綜援資格程序影響，開學津貼須順延發放，但卻無法解釋同一家庭「一個有、兩個冇」的原因何在。關注組織狠批社署安排混亂，促加強內部溝通及檢討。
一筆過的開學及上網津貼原定提早於八月十七日發放，但部分綜援家庭至今仍未獲發。樊女士的兩名子女今年分別升讀中三及中四，原擬以開學津貼支付書簿費及開學雜費，惜至今仍冇着落，「買書要幾千蚊，開學雜費又千幾蚊，諗住有筆津貼搞得掂啦，點知最後都要問朋友借！」
「三仔女一個有兩個冇」
對於遲遲未獲發津貼一事，樊女士曾向社署查詢，惟職員回覆一時一樣，「初時話個大女唔知升唔升到中四所以未批，再問就話要覆檢綜援資格，我八月頭都續咗綜援啦，唔知係咪社署又做錯嘢！」
同屬綜援戶的黃先生（化名）則育有兩子一女，就讀幼稚園的幼女已獲發津貼，但兩名就讀中學的兒子則未獲批核，「三個仔女一個有兩個冇，上網嗰筆又未有，依家日日都要去打簿睇吓過咗數未！」黃不滿社署未能清晰交代事件。
「等電腦部唔忙先過數」
拖延近三星期仍未發放的津貼，經本報轉介後即時獲處理，惟仍只獲發開學津貼，上網津貼卻冇下文。樊曾要求社署一次過發放，未料職員卻拋下一句：「唔知幾時先有，要等電腦部唔忙先過到數！」樊對此不滿，「申請資助啫，點解搞到好似去乞咁？」
社署發言人承認，為確保樊女士繼續符合資格領取綜援，該署須在八月卅一日進行覆檢，有關開學津貼發放日期亦須作出調整，惟全港涉及同類個案數目則未能提供。至於黃先生的個案，則因缺乏詳細資料而無法評論，建議申請人自行向分區辦事處查詢。
關注綜援檢討聯盟組織幹事歐陽達初斥社署處事官僚，漠視綜援人士需要，「根本就行政出錯，有咩理由一個家庭會一個批咗，另外兩個就未批！」
立法會議員陳淑莊狠批社署程序混亂，「本來係一件好事，但係依家搞到呢班八月要覆檢嘅家庭好似畀人遺忘咗咁。」
記者 林永發