政情：胡鴻烈夫婦出書慶三喜
今年係樹仁大學校監胡鴻烈同校長鍾期榮嘅九十歲大壽同六十五周年藍鑽石婚誌，又係胡鴻烈執業為大狀嘅五十五年之喜。喺咁特別嘅一年，兩老趁機將兩人舊嘅法律著作結集成書，重新出版，喺樹仁執過教鞭嘅律師會會長王桂壎都專誠去捧場攞簽名！
胡鴻烈尋日聯同鍾期榮一齊出席新書發布會，佢話喺五十年代時，有感本地法律知識唔普及，又畀英文壟斷，所以就同太太寫成《香港婚姻與繼承法》同《人權與國籍》兩書，希望鼓勵有更多有質素嘅中文法律創作，好開心今年又可以再重新出版畀更多人細閱。
去捧場嘅王桂壎就同我哋講，佢八十年代都喺樹仁嘅灣仔舊校執過教鞭，仲話當時係鍾期榮親自請佢添。
佢憶述，當時樹仁環境未係好好，鍾期榮請佢時嘅聘書亦冇寫明薪金，不過佢對教書好有熱誠，故即時應承冇扭擰。佢又話自己都喺其他大學嘅法律學院教過書，不過始終對樹仁學生有情意結，覺得佢哋上進得嚟又謙虛喎。