政情：即日來回 唐唐條條fing

特區政府前晚出稿，失驚無神公布唐唐滾水淥腳式訪京行程，當時外界已經覺得，事態極不尋常。唐唐尋日中午抵京，隨即去港澳辦見京官，一個多鐘頭後離開，傍晚時分坐飛機返港，期間見過乜嘢人、傾過乜嘢事情，佢全程封口，總之神神秘秘。

政務司司長辦公室話，唐唐係同周波舉行工作會議，就「十二‧五」規劃嘅工作進展、粵港合作等促進香港經濟社會發展嘅事宜交換意見。呢兩個長遠題目，講得白啲係「長命工夫長命做」，點解中央咁急要唐唐裙拉褲甩上京傾，唔等埋目前身在俄羅斯外訪嘅煲呔曾返港再參詳呢？不過，點都無緊要啦，橫豎唐唐平日喺香港都無乜重要嘢做，得閒遊吓飛機河，啱晒「條條fing」嘅佢啦！