政情：嫻姐搵肥亨 為學生打氣
近排頻頻傳出工聯會副會長陳婉嫻被游說出山，備戰「超級區議會」選舉，但見嫻姐仍好嚮往目前悠閒生活，除咗行山同耍太極外，仲好投入勞工子弟中學校監工作。嫻姐早喺一個月前，邀請身兼港大經濟金融學院榮譽教授嘅中策集團主席馬時亨，前日到勞工子弟中學擔任開學禮專題演講嘉賓，同學生分享如何裝備自己面對未來挑戰。
引述邱吉爾名言
肥亨送畀學生嘅錦囊，就係希望學生要學懂從「危」中看到機會，事關有危自有機。佢引述英國前首相邱吉爾名言，悲觀主義者喺每個機會中只會看到重重困難和危機，但樂觀主義者就喺每個困難中睇到無窮機會。肥亨話，活生生嘅例子就係本港畢業生害怕面對內地專才流入造成競爭，如果樂觀面對，可從競爭中學習對手嘅長處。
當然機會係留畀有準備嘅人，所以肥亨提醒學生要勤力裝備自己，讀書要多思考，仲要加強人與人之間嘅溝通技巧，做事仲要抵得諗，咁自然事半功倍。嫻姐大讚肥亨嘅發言同回應相當精彩，仲多謝肥亨抽半日時間幫手，相當畀面。