政情：民主阿婆不甘寂寞

民主阿婆政治能量所餘無幾，尋日出席旅遊專業培訓中心畢業禮暨十五周年儀式，無份主禮、頒獎同致辭，唯一沾上邊嘅，係孿生妹妹方寧生係中心校董。不過，從佢所做嘅，就絕對唔只為妹撐場咁簡單。

形象似足導遊阿珍

大會早上十點半開始，民主阿婆提早十五分鐘到場，剛蒙喪夫之痛嘅佢，講咗兩句多謝各界慰問開場白後，隨即自動波入正題，叫政府做好政改本地立法，嗰份訓令政府做嘢嘅神態，令人不期然諗起因謾罵要求內地遊客購物而鬧出軒然大波嘅女導遊阿珍。

民主阿婆○七年參加「撐普選」遊行時，中途離隊走去恤髮，反映佢撐場只愛撐一半。不過尋日佢卻一反常態，個半鐘頭嘅儀式由頭坐到落尾，到儀式結束，佢仲磨爛蓆唔願離開，原來要等電視台訪問完嘉賓旅發局主席田北俊之後，再嚟訪問佢。民主阿婆原來係不甘寂寞！

對住傳媒鏡頭，民主阿婆即時香港領袖上身，話好驚訝民主黨喺政改一役繞過港府，直接同中央溝通，削弱一國兩制，希望民主黨唔好重蹈覆轍。佢又以家姐教細佬嘅語氣，叫港府喺政改上做好領導角色，唔可以袖手旁觀。跟住民主阿婆話，香港無迫切為廿三條立法、叫香港市民唔好為菲國人質事件遷怒菲傭、中央揀未來特首要同時注重人品、誠信同管治能力……，總之，就乜都關佢事啦！

唔知着衫係咪可以反映當事人心態，民主阿婆尋日着住嘅一襲黑底白點旗袍，睇落熟口熟面，正係二千年以特區「冧巴吐」身份上京面見錢其琛時所穿，當日錢當面訓示佢要更好配合特首工作，跟住無耐佢就遞大信封辭職，提早退休。民主阿婆尋日再披「戰衣」，唔通想話畀人知，佢嘅政壇野心仍然死心不息？