政情：李國麟冇時間出家
連續第二屆做立法會衞生服務界議員嘅李國麟（Joseph）慨嘆，做咗議員之後少咗好多私人時間，甚至連參加七日短期出家嘅時間都無。講到要出家咁大件事，莫非Joseph佢打算喺二○一二年退選立法會？
身兼公開大學護理學系副教授嘅Joseph以前睇過一齣介紹妙法寺七日短期出家嘅紀錄片，佢充滿好奇躍躍欲試，猛咁讚「好好玩㗎」，又如數家珍咁話，參加短期出家要每朝早四、五點起身，食完粥水或者稀飯嘅早餐後，就成班人一齊唸經，可以一嘗做和尚嘅滋味，可惜因為無時間而無參加。
Joseph又話，自從做咗議員後，連見吓佢位喺那打素護理學院做院長嘅老婆都無時間，有時甚至要靠邀請佢哋兩公婆出席活動嘅團體識趣啲，安排佢哋兩公婆坐埋一齊，咁先至可以增加見面機會！Joseph講到咁，似乎對做立法會議員意興闌珊，唔通下屆佢想退選？Joseph就話，關於下屆參選與否呢回事，依家仲言之尚早。