政情：選戰腹背受敵 甘威唔知驚
各黨派就立會選舉嘅部署內弛外張，白鴿黨咁多位煩緊冧莊嘅立法會議員裏面，最頭痕嘅相信都係甘乃威嘞。甘威去年因女助理事件而「聲名大噪」，有傳呢單嘢爆出後，唔少黨友都吼住佢個位，最近連民建聯都開始出手準備爭位。不過，腹背受敵嘅甘威坦言未驚過，話自己多年來喺地區工作，唔係咁易就畀人取替到喎。
甘威去年尾爆出女助理醜聞，對佢嘅政治生涯影響甚大。不過佢班黨友並冇手下留情，好似馮煒光同副主席「
雞」單仲偕早已報名嚟緊喺港島出選，雞早前更高調喺東區開咗個辦事處，話唔係吼住佢個位都冇人信。最近就連民建聯都利用銀彈政策，喺中西區租咗兩個地舖開辦事處，擺明衝住甘威而嚟。
腹背受敵，甘威似乎未驚過。佢話依家港島區嘅勁敵，好似公文袋黨魁余若薇同匯賢智庫葉劉淑儀咁，都趨向明星化，喺地區冇乜作為；相反，佢喺中西區「揼石仔」多年，自己呢啲地區貢獻除咗有利佢嚟緊嘅區選選情外，亦係佢立選冧莊嘅籌碼，上個月仲還晒為上屆立會選舉借咗嘅五十萬，嚟緊啲錢鬆動啲，會繼續積極開辦事處反擊。