中環出更：名人二代聚京開青聯大會
第十一屆全國青年聯會會議尋日正式開幕，富豪名人之後雲集北京人民大會堂見證開幕一刻外，並為明日選舉正、副主席、常委及委員作準備。被視為副主席熱門嘅香港青聯主席陳仲尼（Rock）及新世界發展執行董事鄭志剛（Adrian），入咗今次主席團成員，有份參加主席團會議，兩人更上一層樓做全國青聯副主席，相信已坐定粒六。
今屆全國青聯港區委員一共有八十名左右，盛傳港區攞到十至十一個常委名額，熱門人選有菁英會創會主席施榮忻（Jaime）、霍老長子嫡孫霍啟剛、觀瀾湖球會主席朱樹豪大仔朱鼎健（Ken）、開拓網上商務平台嘅吳傑莊、香港青聯常務副主席葉振都、前香港青聯主席許華傑、香港研究協會主席蘇祉祺、莊士集團主席嘅大仔莊家彬（Albert）等。
小組會為遇難港人默哀
至於新委員當中，幾乎個個非富則貴，好多都係富豪名人後代，好似合和實業主席胡應湘兒子胡文新、金城營造主席王國強大仔王紹基、百老滙老闆李子良囡囡李至慧（Wendy）、全國政協委員盧文端兒子盧金榮、南豐集團陳廷驊外孫張世成、曹光彪孫女曹穎惠、天滙股東之一嘅培新控股楊紹東等。與政界關係較為密切嘅，就有立法會議員梁君彥兒子梁宏正、林健鋒囝囝林凱章、以及前港澳辦高官女兒陳晴，不過今屆名單上就無晒啲歌星同藝人委員。
由於今屆來自港區嘅全國青聯委員競爭好激烈，卓妮八到，佢哋今屆整體出席率特別高，好多參加完開幕禮後都有繼續參加分組討論，同以往好唔同，部分小組仲喺開始前為前日喺馬尼拉遇害嘅港人默哀。中央統戰部晚上就設宴款待上京開會嘅青聯委員，與會者包括中央團委書記陸昊及統戰部四個副部長。
不過喺八十名委員中，有四名請假，包括李宗德女兒懷孕缺席，全國人大常委范徐麗泰兒子范駿華就話有要務在身，另一個缺席嘅就係霍啟剛，要帶隊去新加坡參加首屆青年奧運會，原來佢女友「跳水公主」郭晶晶都有同行，仲獲當地邀請擔任「運動員榜樣」推廣環保知識，期間有人影到啟剛體貼遞飲品畀郭晶晶，大晒恩愛，以行動粉碎情變謠言。