中環出更：「五虎將」開P齊賀六十大壽

田北辰太太來個性感突擊，一襲火紅色tube dress搶晒鏡。卓妮問田太送乜禮物賀老公，未等太太開口，二少就「搶答」話：「佢送咗半年心血畀我，為我籌備呢個生日派對。」田太咁體貼，二少輕搭太太香肩回贈愛的宣言，話送個心畀老婆。呢個星期四係二少正日生日，咁啱要上京開會，好彩太太上京陪佢，唔會寂寞喎。

中西合璧菜式 雪芭間場

生日之星Dennis孫都唔執輸，當眾示愛話，多謝太太送咗好多愛畀佢，唔使再送其他禮物。兩口子過兩日起程去莫斯科歎世界。俄羅斯早前發生山火，氣溫急升，Dennis上網查過，知道溫度回降到正常，安心出門喎。

到賀嘅嘉賓亦成雙成對，包括田二少哥哥田北俊夫婦、中總榮譽會長霍震寰夫婦、合和主席胡應湘夫婦、「零食大王」戴德豐夫婦、中策集團主席馬時亨夫婦、前財爺梁錦松夫婦，仲有新地副主席郭炳江等人，嘉賓多達三百人，收禮都收到手軟。

「五虎」以中西合璧嘅菜式款客。先食乳豬件、滷水鮑片拼鴿蛋、露笋明蝦球、薑葱龍蝦蛋麵、酥皮魚翅水魚湯，食到呢度，侍應端上一客冰涼蜜桃雪芭，等賓客清清口裏面嘅味道，輪到西菜上枱，包括焗法式青胡椒和牛配干邑汁、香煎龍脷柳配檸檬牛油汁等，最後當然唔少得主角壽包喇。壽宴笑聲不絕，非常熱鬧，卓妮都祝「五虎」年年有今日，下次賀七十大壽，記得叫埋卓妮噃。

田北俊（右二）與太太（中）及友人齊來，右一為玩具大王丁午壽。 （楊歡成攝）	郭炳江	梁錦松夫婦（葉華英攝）
胡應湘夫婦	馬時亨夫婦

卓妮