政情：議員抖暑各適其適
立法會今個星期三開埋最後一次例會，之後就正式休會抖暑；至於要拖幾多日先至埋到尾，依家無人說得準。不過，唔少議員已度好外遊節目。夏天去東南亞享受陽光海灘固然係唔錯嘅選擇，但公民黨黨魁余若薇（Audrey）嫌唔夠cool，寧願飛去湖光山色嘅新西蘭去滑雪。立法會議員潘佩璆愛靜，寧願留喺屋企「攤抖」。
余若薇外遊 潘佩璆睇書
澳紐天氣同香港啱啱相反，唔想喺香港「乾蒸」，去南半球避暑絕對一流。Audrey暑假計劃去澳洲同新西蘭度假。依家咁興自駕遊，澳洲同香港又同樣係右軚車，唔知Audrey會唔會試吓呢？Audrey一聽到自駕遊就話咪搞，原來今次旅行主要係去新西蘭滑雪，澳洲只會留一日咁多，所以冇時間自己揸車玩。
不過潘佩璆就唔想出門嘞，佢話，匿埋屋企睇書最正，近日睇緊《貨幣戰爭》，本書講述唔少政治同金融知識，對佢從政好有幫助喎。潘佩璆乜書都鍾意睇，皆因身為精神科醫生嘅佢，不時面對來自五湖四海嘅人，既有金融才俊，亦有黑幫大佬，所以見識要夠廣博，咁至容易打開話匣子喎。