政情：掌握中央取態 民協靠羅祥國扯線

朱育誠係前新華社香港分社副社長，佢揸旗嘅呢個港澳研究所係○三年五十萬人上街後成立，標榜研究港澳地區形勢以及落實一國兩制方針，其實有份負責收風。不過，原來朱育誠同本港好多溫和泛民都有偈傾，包括與終極普選聯盟嘅學者都有唔少接觸。早前盛傳普選聯嘅兩位教授陳健民同葉健民獲邀上京，就係朱育誠從中拉線，雖然最後唔成事，不過就暴露咗兩者關係密切。

搭通朱育誠居中斡旋

知情人士仲透露，羅祥國同朱育誠喺政改方案斡旋過程中，都有唔少功勞。羅祥國一直將溫和泛民主派嘅意見帶畀朱育誠，又會轉述中央睇法。好似喺港府四月啱啱推出「翻叮」政改方案時，引起普選聯極度不滿，想綑綁否決方案。羅祥國嗰陣專登提醒佢哋，即使唔鍾意方案都好，千祈唔好同中央「反枱」，斷絕全部溝通機會，否則前功盡廢。

據聞喺煲呔曾歷史性同所謂「五區公投」發言人余若薇辯論前夕，羅祥國都盡最後努力，透過朱育誠上書北京，指煲呔曾會喺辯論中大敗，原政改方案嘅支持度亦會因而大跌，要本港政制有轉機，民主黨嘅區會方案會係最後下台階。羅祥國仲喺報告分析，如果今次政制再次原地踏步，溫和民主派一定全軍覆沒，一係輸咗議席，一係就被迫加入激進派，咁四年後本港再討論政制問題，掣肘就會更大，希望中央再三考慮民主黨方案。

難怪羅祥國六月十九日中午透過短訊告知民協主席廖成利，透露中央已決定接受民主黨方案，比煲呔曾六月廿一日公布消息早咗兩日，據聞呢個消息就係來自朱育誠。雖然羅祥國同朱育誠為泛民搭通天地線，不過政改談判過程中，發功嘅中間人何其多，邊個功力最深，邊一招先令中央回心轉意，相信只有中央最高層最清楚！