遮唔住短訊來源
當日老虎仔向記者展示手機短訊時，唔夠快手，掩唔住短訊來源係「Law Cheung Kwok CK」。羅祥國九七年以民協成員身份擔任臨時立法會議員，其後退出民協，若中央因政改要同民協接觸，由佢做中間人都好合理。
此外，據聞○五年政改一役時，羅已經做過一次「中間人」，今次終於無白費工夫。當然，中央嘅主要目標係民主黨，「Law Cheung Kwok」嘅角色無詩姐咁關鍵，不過點都叫有份喺背後出力奔走。
我哋向老虎仔求證，佢不置可否，話自○三年後，中央不同系統嘅人定期同香港政黨接觸，有中間人同民協交流亦好平常咁話。