政情：李運強冇賭運有孫運
馬季快抖暑，醉心賽馬嘅「造紙大王」李運強尋日喺馬場總結今季投注戰績，佢笑言「冇計贏，只計輸幾多」，擺明唔志在。但講到抱孫，佢就係大贏家。兩位新抱月前分別為李家添咗三個ＢＢ，同屬虎年生肖。已有五個孫嘅李運強，月前大仔文俊又添丁，一個月後，細仔文斌都添咗一對龍鳳胎，即係三喜臨門。李生見孫就心甜，包咗兩封大利是獎勵新抱，稍後會擺滿月酒同親友慶祝。
施子清有個叻孫女
兒孫滿堂嘅仲有全國政協委員施子清，尋日同太太入場為兒子愛駒打氣，佢透露啱啱出席完大孫女喺美國嘅大學畢業禮。孫女好叻，早前喺五百人中突圍而出，成功攞到羅兵咸永道會計師事務所聘書，遲啲返香港做嘢。
講番馬場賽事，醫管局主席胡定旭原本唔睇好愛駒「八逢九紫」，更揶揄愛駒「好廢」。話口未完，「八逢九紫」跑個第二，肥胡荷包進帳十八萬七千元，飲得杯落，但佢坦言今個馬季輸多贏少，當係做善事喎。