政情：煲呔曾BBQ宴 民記「焗」撐

咖喱雞炸魚皮勁熱氣

尋日中午，粉嶺一帶氣溫徘徊三十四度左右，煲呔曾獨家招待民記成員喺別墅草坪上帳篷中食嘢，無論賓主都熱到一身汗，事後民記成員證實，原來大家全程都喺室外，冇入過屋。

出席嘅民記成員好似主席譚耀宗同立法會議員陳鑑林都多謝煲呔曾熱情招呼，曾太仲親手做筒仔豆腐花畀大家食添。另一位立法會議員李慧琼就承認現場真係熱得好緊要，一班新星，包括中委葛珮帆同陳恆鑌等都有出席。今次除咗燒烤之外仲有咖喱雞同炸魚皮，好似慌死唔夠熱氣咁，真係多謝晒！

煲呔曾尋日傍晚發表網誌，話充沛嘅陽光，加上出席人士嘅熱情令到BBQ活動氣氛高漲喎。立法會議員黃容根同黃定光熱到出晒油，佢哋都忍唔住講：「熱呀，真係好熱，食完即走。」有網民仲喺煲呔個網誌留言：「咁都冇中暑，算你好彩！」

一班「鴨仔」喺草坪浩浩蕩蕩，全程冇得入屋。（facebook圖片）

新聞處處長黃偉綸熱到成件衫濕透，可見天氣如何酷熱，旁為其太太陳穎韶。