政情：白鴿黨暗藏兩招算帳
政改大戰落幕，泛民走向大分裂，民主黨被其他泛民追打，白鴿慘變燒乳鴿。民主黨唔係善男信女，從政更加唔係開善堂，被人抽完政治油水，筆債遲早要算帳。據悉，民主黨手底下暗藏兩招殺着，一直留而不用，若然公民黨派人競逐五個區議會「超級議席」，民主黨就會出招反撲，屆時泛民內訌勢必加劇。
一場「五區總辭，變相公投」，泛民割裂出兩條路線，主張同中央鬥到底嘅「激進派」社民連同公民黨，跟「溝通派」民主黨已經成日喺枱底拳來腳往，民主黨撐政改方案通過，更被責出賣港人，不斷被圍攻追打。過去兩個星期，民主黨罵不還口，打不還手，「激進派」一隻手掌打唔響，「民主派」呢塊蟲蛀腐朽嘅大牌匾尚算勉強維持，不過，相信呢種局面亦唔維持得幾耐。
捉住反政改痛腳狂質
消息指，民主黨高層要反噬「激進派」，起碼有兩招撒手鐧可用，只係為免加深民主派內訌形象，自我克制，如果「激進派」再苦苦相逼，民主黨就會唔客氣。首先，如果公民黨派人競逐二○一二年新增嘅五席區議會功能界別議席，民主黨會公開質問對政改方案投反對票嘅公民黨，既然反對，點解又要參選？尤其當部署出戰嘅人係公民黨黨魁余若薇，余即係喺呢場政改大戰中又食又拎，民主黨唔會輕輕放過公民黨。
第二，「激進派」自封政治道德判官，未審訊已經先判民主黨死刑，如果民主黨要反咬一啖，可以反問「激進派」：「你哋反對政改方案，即係代表三百二十萬名喺功能界別無投票權嘅選民拒絕佢哋嘅投票權利，你哋憑乜嘢可以咁做？」
打從民主黨唔參加「五區公投」，已經同公民黨、社民連分道揚鑣，民主黨唔使顧住兩黨拖住後腿，可以同中環、西環，甚至中央就政改展開談判，政改方案通過後，下一步就係去到選民中間搶票，所以儘管民主黨唔想矛盾激化，有啲說話未講出口，上述兩件咁有攻擊力嘅武器，遲早都要拎出嚟大開殺戒，相信當選舉臨近，泛民之間嘅矛盾就會自然浮現，到時將再無必要淡化矛盾，亦無辦法隱瞞呢啲矛盾。