中環出更：范太自駕團遊黑龍江
馬仔都抖暑啦，身為馬會大董嘅范太亦都做好準備放暑假，今個夏天佢會同廿幾卅個老友記，組織車隊去黑龍江十幾日自駕遊，范太話嗰邊天氣好宜人，非常之涼爽，對比起香港卅幾度嘅天氣，難怪未出發先興奮。
黑龍江鄰近俄羅斯，近排美俄兩國互換間諜，范太話佢都有上網跟進新聞，唔講唔知，原來佢好迷間諜嘅片種，除咗西片之外，最近仲欣賞咗國產嘅間諜電影《風聲》添。通常電影入面嘅女間諜都好有型，不過范太就斬釘截鐵話自己從小到大都無幻想過做女間諜，因為自己唔會做呢啲搵命博嘅嘢，淨係鍾意安居樂業，所以淨係鍾意做觀眾睇人做刺激嘢。
講番黑龍江，好多人都以為淨係冬天白雪雪先好玩，其實佢哋係全國聞名嘅避暑勝地，雖然夏天多雨，不過佢哋有全國最大嘅高山堰塞湖、鏡泊湖，又有自然保護區，仲有世界最大的界湖興凱湖，景色相當宜人。