中環出更：袋巾傑變身住家男人
家，永遠係成功男士最後嘅堡壘，辛苦一日，返屋企沖番個熱水涼，一樂也。公民黨梁家傑原來除咗鍾意買袋巾，仲好着重浴室布置，早幾日佢親自去太子大廈嘅Bed & Bath，摸吓呢樣，睇吓嗰樣。身為大狀同立法會議員嘅袋巾傑，竟然係住家男人一名。
唔攞膠袋夠環保
Bed & Bath專營寢室及浴室用品。上星期六晏晝五點半，卓妮撞見着住淺色便裝嘅袋巾傑逛Bed & Bath，一行入去就用手比畫，問店員有無靚浴簾賣，店員醒目地遞上產品目錄，任君選擇，可惜睇咗幾分鐘，佢都係揸唔定主意，身為一家之主嘅佢，最後都係打電話徵詢老婆大人意見，最後都拍板買咗一幅淺色浴簾。
臨畀錢時，袋巾傑見到架上擺咗啲又滑又軟嘅毛巾，忍唔住摸咗幾下，但諗到屋企嗰幾條仍然非常新淨，都係唔買嘞。相信已經掛咗喺袋巾傑浴室陪佢沖涼嗰塊浴簾一啲都唔貴，盛惠八十元，卓妮仲留意到，袋巾傑身體力行支持環保，畀錢後連膠袋都費事攞，就咁拎住包浴簾走人。
卓妮喺舖頭門口上前打招呼，袋巾傑顯得好愕然，問佢點解連買浴簾咁瑣碎嘅事都要自己出馬，佢和顏悅色話：「屋企嘢，無話邊個話事嘅，有需要咪自己走去買囉！」
講番Bed & Bath，浴室用品全部來自英國、法國及葡萄牙，設計典雅，啱晒想營造品味家居嘅人，喺太子大廈呢間分店，開咗已經超過十年。
卓妮