逾百長者免費暢遊昂坪360
「老驥伏櫪，志在千里」！不少長者雖踏進暮年，但外出遊玩、增廣見聞的意欲與年輕人一樣強，只是礙於經濟，加上苦無同伴而難以成行。為使長者能無憂無慮享受纜車之旅、俯瞰蒼翠山巒等美景，昂坪360特別舉辦「長者開心暢遊昂坪360」，透過東方日報慈善基金送出一百二十張門票，讓一眾長者可以一遂旅遊心願。
「我想去靈猴影院睇吓」、「你喺車廂望唔望到大佛呀」，一眾長者早前乘搭纜車甫抵昂坪市集時，即表現得萬分雀躍，並熱烈地與同行者分享所見所聞。過去從未踏足過昂坪市集的麥婆婆沿途不斷讚嘆昂坪風光，「我哋啲長者好難得可以出嚟玩，而且仲要嚟咁遠，真係好開心！」
「開心又健康咗」
麥婆婆坦言，獲悉昂坪360贊助長者門票後便第一時間報名，「以前好少出街，個人喺屋企成日都唔舒服，自從參加多咗活動，成個人就開心咗又健康咗，仲唔使成日睇醫生！」馬婆婆亦深有同感，「老人家有得食有得玩就開心，我哋雖然老，但係都好想周圍睇吓、行吓。」馬婆婆希望仍能在有心有力之年能欣賞香港風光。
「好多長者嘅經濟都唔係幾好，有個九十幾歲嘅長者都想嚟，可惜名額有限抽唔中，希望以後有多啲機會。」深水埔街坊福利會陳昆棟老人康樂中心主任黃美娟稱，愈多私人機構慷慨支持，將可讓更多長者可一圓遊覽本港旅遊勝地的心願。
昂坪360對外事務經理羅玉萍表示，昂坪360一向關心社會，過往亦曾與不同社福機構、環保團體合作，讓長者、兒童、殘障人士等，盡情體驗昂坪360繽紛之旅。
記者：莫麗珊 攝影：羅錦鴻