政情：田二少自言唔夠出名
自從「一人兩票」方案獲立法會通過，各黨各派旋即展開部署，睇睇派乜人參選最啱。由於嗰五個新增嘅區會議席將由三百幾萬喺傳統功能界別無票嘅選民選出，預料吸引各政黨「分量級人馬」參選。不過自由黨常委田北辰尋日出席一個活動時，就謙稱自己唔夠出名，唔敢染指呢五席喎！
田二少咁早就決定唔玩新嘢，係有理由嘅，佢話要爭呢五個咁「超級」嘅議席，必須超級知名先得，但佢覺得自己唔係喎，又擔心做咗區議員後，花唔到時間服務當區市民，過唔到自己嗰關。
早前立法會補選，田二少已經先發制人，率先自掏腰包印製十萬份精美單張，仲喺兩個選區派畀選民，可見佢想競逐立會議員嘅決心絕對不小。最後建制派決定集體杯葛補選，先令田二少參選夢碎。不過田二少唔喺區會功能界別議席出選，咪疊埋心水喺新界西參加分區直選囉，可能佢早已決定喺呢區出選，唔想兩頭唔到岸呢。