政情：煲呔曾面臨拋錨危機
日本豐田車廠公布，旗下凌志（Lexus）同皇冠（Crown）八個車款引擎出問題，隨時行駛途中死火，需要回收，其中一款LS600hL型號，原來正係煲呔曾同「唐唐」唐英年嘅政府座駕用緊，兩人隨時拋錨。
政府物流服務署話，八個出問題車款中，LS600hL型號喺高官座駕中有三部，一部係煲呔曾座駕，用咗三年，兩部喺政務司司長辦公室，即唐唐有份用，署方已收到凌志代理商通知要換零件，零件到港之日，就係三部車入廠之時。至於煲呔曾同唐唐呢段時間使唔使換車，物流署話，代理商指三部車仍然可以用喎，即係三部車會繼續用啦。
雖然豐田喺香港只強制回收凌志LS460同LS600h兩款型號，LS600hL唔屬於強制回收咁嚴重，但三款用同一款引擎，煲呔曾團隊由政治騷舞台返到現實世界，同樣面對「拋錨」危機！