政情:邱太教子開P要小心

雖然尋日天氣酷熱,但都無損遠東集團創辦人邱德根入馬場觀看賽事嘅雅興。邱德根同太太一向有影皆雙,係商場上嘅模範夫妻,但係幼子邱達根(Duncan)最近被影到同o靚模遊船河,邱老太一聽我哋問起件事,就忍唔住嘆氣話,佢事後同囝囝傾過兩句,但仔大仔世界,惟有叫佢行事小心啲啦!

早前Neway太子爺薛嘉麟被人發現同埋一班富豪第二代,包括已婚嘅Duncan同埋全國人大常委范徐麗泰囝囝范駿華等,同o靚模遊船河。事件掀起城中一陣熱話,好多涉事當事人嘅父母都免不了幫囝囝解畫。前日范徐麗泰就話信任乖仔,不過個仔已經卅幾歲,都唔管得咁多!

邱老太好無奈咁笑謂,佢冇鬧過Duncan,始終囝囝有佢自己嘅朋友,做父母嘅只係勸解佢行事小心啲。至於Duncan有冇畀太太Natalie扭耳仔?邱老太好豁達咁話,呢啲事等佢自己處理啦!Duncan同太太結婚六年,育有兩名分別四歲同埋兩歲嘅囝囝。

為應屆會考生打打氣,請瀏覽on.cc《放榜無限分2010》專輯