政情：陳永棋捧德軍有斬獲
世界盃足球賽進入四強，城中名人個個都唔捨得唔睇，特別係前晚德國對阿根廷場賽事，阿根廷被淘汰出局，好多球迷都跌晒眼鏡。但係全國政協常委陳永棋慧眼識英雄，佢自爆話，前日心血來潮投注二百六十元買德國贏，結果贏咗八百幾蚊添！
尋日棋哥匹靚駒「精密紡」喺沙田馬場出賽，佢梗要去捧場，雖然隻馬唔爭氣輸咗，但棋哥第一次買波就中，手氣唔錯。咁會唔會乘勝追擊，喺德國對西班牙賽事再試吓？棋哥話，若果德國喺四強勝出，打入決賽，佢都會再買波支持吓。
「演唱會之父」張耀榮喺澳門觀看該場比賽，佢同朋友牙骹戰，貼中德國隊贏波，佢大讚德國隊表現好精彩。但另一邊廂，阿根廷粉絲就大失所望喇！立法會議員林大輝前日喺維園踢完波，去柏寧酒店食飯兼睇波，點知阿根廷輸咗。佢冇晒心機咁話，嚟緊唔捧南美啦！
陳祖澤轉軚
馬會主席陳祖澤（John）係巴西、阿根廷嘅球迷，但兩支勁旅相繼執包袱返家鄉，John都話冇辦法！餘下嘅賽事佢會轉捧德國隊。
馬會大董利子厚雖然捧阿根廷場，但佢都輸得心服口服，仲勁讚德國隊犀利到好似機械人咁，話阿根廷的確技不如人喎。