政情：政改新方案救番三散人
政改方案通過後政壇大洗牌，泛民同建制派嘅支持者有可能大兜亂，加上政黨原本就明年區議會選舉嘅部署都要重新度過，當中變數極多，要計吓邊個政黨有賺、邊個要蝕入肉，絕對係唔容易。政改執位後，長遠邊個政黨係大贏家好難講，不過喺短期得益、或者叫做順利過關嘅，肯定就係五散人三子，包括會計界陳茂波（Paul）、IT界譚偉豪（Samson）同醫學界怪醫梁家騮嘞！
親建制怕失泛民選票
何解？咪就係因為佢哋有唔同嘅選民背景囉。會計界、IT界同醫學界都出產過泛民或建制背景嘅議員，原因為呢三個界別嘅選民，泛民同建制比例五五波，所以兩大陣營次次選舉喺呢幾個界別都爭崩頭，結果亦年年有變。所以一到政改呢啲敏感議題，五散三子就非常頭痛，因為佢哋屬於親建制派，但又唔可以置近半嘅泛民選民意願於不顧，完全係夾心人。
政改曙光喺表決前唔夠一個禮拜至出現，喺曙光出現前，三子各自以政府推出嘅方案做民調諮詢業界意見，得出結果都令佢哋好為難。其中阿Paul話當時覺得反對方案嘅選民佔大多數，怪醫喺政改表決前三日見煲呔曾時都提過，大部分醫學界選民唔鍾意個方案，所以如果要佢哋兩個硬撐政改將會好危險，等同陷佢哋於不義。IT界嘅調查結果好少少，大約七成人支持，不過Samson調查嘅回應率低過一成，拎上手都唔知信唔信佢好。
正當五散人三子都頭痕唔知點投票之際，政改就出現曙光，打救咗佢哋一命，呢個就係民主黨嘅一人兩票方案。煲呔曾喺政改表決前兩日先明確表示民主黨方案可以接受，令三子大條道理話做唔切新民調，自己決定點樣投票；加上方案真係大大增加民主成分，佢哋唔少本身反對方案嘅選民都轉軚表示支持，喺呢個基礎上，佢哋要支持方案就更加得心應手，一嚟唔會得罪政府，二嚟又唔使驚違背選民意願，影響下屆選情，可謂一舉兩得。不過政改另一波、本地立法嘅問題又就嚟殺到，各派系喺選舉細節上又會有排拗，唔知到時三子可唔可以順利過關呢？