中環出更：林貝聿嘉鍾情百達翡麗
扮靚係女人終身事業，年紀大啲，一樣要靚。好似年近八十嘅香港婦協主席林貝聿嘉，戴錶一樣要多變，佢鍾情百達翡麗（Patek Philippe）一款可以換錶帶嘅鑽石手錶，一口氣買埋黑白兩色錶帶。
林太早前出席朋友嘅新書發布會，手挽LV袋，潮流觸覺唔會輸畀後生女。林太右腕戴上一隻白色百達翡麗，佢話隻錶買咗兩、三年，係買嚟氹自己開心。
錶帶吸引買埋黑色
卓妮八到，隻錶型號係5067A Aquanaut Luce系列，賣點係錶面鑲有四十六粒鑽石，閃閃生輝，價錢超過十萬元。不過最吸引林太嘅唔係啲鑽石，而係條白色膠錶帶，簡約中顯優雅，林太愈睇愈鍾意，襯上身百搭到極，於是畀多千幾元，買埋另一條黑色錶帶，得閒換吓款，又係另一種生活樂趣！
