中環出更：余若薇街坊Look游走中環
講到形象百變，公民黨黨魁余若薇（Audrey）都算一絕，身材高挑嘅佢經常名牌上身，唔同風格唔同顏色都勇於嘗試。但原來佢一到周末就放下拘束，着T恤襯孖煙囪式短褲，一身街坊裝游走中環歎咖啡，仲以素顏示人。呢一日佢再唔係立法會議員同資深大律師，而係同兩個囡囡非常老友嘅媽媽。
同囡囡返屋企食飯
上星期六，卓妮行經中環太子大廈，撞見着住花花短褲、白膠底鞋嘅Audrey喺La Maison Du Chocolat歎茶。嗰陣係傍晚六點半，過晒high tea時間，茶座環境清靜，Audrey一於坐低歎咖啡，一邊細閱文件。疊文件有成兩吋厚，Audrey一面睇，一面用原子筆記低重點。
坐咗大半粒鐘，兩個穿着T恤牛仔褲嘅美少女上前拍佢膊頭，原來係Audrey嘅囡囡琳琳同琦琦，佢兩個喺外國讀書，近日返香港放暑假。Audrey一共有三個寶貝女，今次唔見大女現身。喺女兒催促下，Audrey起身走人，三人行去立法會停車場攞車，沿途有講有笑，細女琦琦更主動幫媽咪拎文件。眼前出現三個「長腿姐姐」，Audrey兩個女嘅高度，拍得住媽咪。三人行到去立法會停車場後，登上一部淺藍色Honda七人車，由二女琳琳揸車，載媽咪返屋企食飯。
Audrey有品味，識着衫，但呢個講法，佢囡囡未必認同。Audrey曾經同卓妮呻，話要買衫褲鞋襪畀佢哋不知幾難，好難估佢哋是否鍾意。佢今次呢一身周末造型，睇怕都可以拉近距離喇啩。
卓妮