中環耳目：賭王愛食杧果忌廉蛋糕
品味生活，貴精不貴多。Afternoon Tea來一件精緻蛋糕，整天都會心情開朗。講到食蛋糕，賭王何鴻燊最愛COVA，心水之選係杧果忌廉蛋糕（Mango Cream Dome），即使喺家中養病，都叫千金超雲幫佢買外賣。
到底杧果Cake有幾正？據海港城COVA餐廳經理陳明鈞話，呢款蛋糕係熱賣口味，金黃色外層，內裏有三層海綿蛋糕、兩層鮮忌廉及兩層新鮮杧果蓉，雪白忌廉軟滑無比，入口即溶，難怪賭王都受唔住誘惑，食到舔舔脷。兩磅裝杧果忌廉蛋糕盛惠五百三十元，亦有一磅裝。
COVA喺意大利有逾百年歷史，香港COVA提供意大利菜及甜品，佢嘅Homemade蛋糕，俘虜城中名媛淑女。千億新抱徐子淇、最美麗港姐朱玲玲等，都喜歡去COVA High Tea。
何家淑女超蓮都迷上COVA，早前買咗個杧果蛋糕同家中兩隻倉鼠慶祝生日；家姐超雲鍾意冰涼感覺，COVA嘅香滑雪糕啱晒佢。
