政府齋噏「關愛文化」，其實啲政策有幾何同市民百姓一起歡喜、一起同樂啊？
最近豪花成千萬元，成日落區「起錨」，大佬啊！連駕船去邊都未知，起乜鬼「錨」？一味起哄又不理民間疾苦，好心慳啖氣做吓正經事啦。好似嗰位勞工及福利局局長張建宗，最叻打官腔，「居家安老為本，院舍照顧為後援」，口號堂而皇之，實則輪候資助護養院及護理安老院宿位期間離世長者人數，舊年分別係一千八百多人及二千七百多人，換言之，佢哋等唔到政府嘅終極關懷就離世，「關愛文化」其實係「關人文化」，而漠視人口老化，連骨灰龕都未能提供給市民，「終極關懷」又質變成「終極抱憾」。
張建宗一味死撐，話並非每位有長期護理需要嘅長者都一定要入住安老院，跟住又耍一輪太極，招牌式廢噏：只要有足夠社區支援，長者可以留喺屋企安老。這不正是「何不食肉糜」的現代版本？有不少長者冇人冇物，政府唔幫，佢哋就「去」得好淒涼。實情係，三年新增得約千五個資助宿位，而輪候的長者卻有約二萬六千人！
齋噏解決唔到問題，老朽介紹日本作家筒井康隆的小說《銀齡的末日》畀張局長參考：未來日本政府為了應對日益加劇的老齡化問題，出台了駭人聽聞的《老人相互處死制度》，在全國設立了七十歲以上老人相互殘殺的「特區」。在為期一個月的時間內，每個「特區」只有一名老人能夠安享天年。為了爭奪老來生存權，小說一開頭就十分血腥——七十七歲的宇谷九一郎用手槍打爆多年來一同下圍棋好友的腦袋……