關鍵戰役人人搶 第5回合拜林主宰
明日NBA總決賽上演最關鍵一戰，塞爾特人將會喺最後一場主場賽事迎戰湖人。兩隊目前打成二比二，邊隊贏到重要嘅第五回合，就可叫胡捧盃。不過湖人今場面對最大嘅難題，係中鋒拜林膝傷極可能缺陣，上場湖人冇咗拜林，即刻畀塞爾特人嘅「Big Baby」格連戴維斯搗亂籃底，今場真係要打醒十二分精神至得。（無綫高清翡翠台及now 670周一早上8時直播）
湖人中鋒拜林上場只係上陣十二分鐘就退下火線，據報佢嘅膝頭誇張到腫到好似籃球咁大，昨日完成核磁共振檢查後，發現傷勢冇惡化，稍後將進行抽積水，希望可趕及復出。拜林表示，已作好心理準備今場帶傷上陣。
湖人籃底靠拜林
不過，湖人嘅積遜教練表示唔會勉強，因為佢好有信心即使拜林缺陣，湖人依然有好大勝算：「如果拜林可以上陣梗係好，佢有身高優勢，而且又強壯，幫我哋搶到好多籃板，但我哋一樣有其他戰術可以擊敗對手。」
拜林上場退下火線後，令塞爾特人盡得籃底優勢，塞爾特人上場喺鎖匙圈內取得54分，較湖人嘅34分足足多20分。塞軍教練李華士不諱言，如果拜林今場缺陣，一定會強攻湖人籃底！拜林仔，湖人今場食粥食飯睇你喇！
本報綜合報道