政情：陳仲尼有個收料網
香港青年聯會主席陳仲尼（Rock）同東華三院主席梁定宇早前出席一個公開活動，講開世界盃。兩位主席不約而同話自己好喜歡足球，不過只限睇波，唔識踢波，阿Rock仲話自己最喜歡強隊，邊隊強就捧邊隊，因為咁會睇得投入啲喎。阿Rock更加即場約埋梁定宇去佢屋企作客兼睇波，實行與眾同樂。
阿Rock同太太區海倫育有兩個分別係十歲同七歲嘅囝囝，原來佢兩個都係標準足球迷，仲好鍾意拉爸爸一齊睇波添，嚟緊Rock會多咗好多親子時間嘞。講開睇波，好自然會令人聯想到賭波啦，唔知身為香港青年聯會主席嘅佢會唔會擔心兩個囝囝有樣學樣呢？
阿Rock話唔驚，皆因自己同朋友嘅仔女好多都讀埋同一間學校，囝囝有咩事都會講畀同學知，啲同學又話畀爸爸媽媽知，最後咪又走番入佢耳仔！有呢個層層緊扣嘅關係網，難怪Rock唔驚囝囝行差踏錯啦！