政情：何鴻燊任中央財經大學榮譽顧問
中港兩地經濟密不可分，就連名人輩出嘅中央財經大學會計學院都首度挑選本港商界猛人做榮譽顧問，獲選名人包括何鴻燊博士、郭炳湘博士、方潤華博士、馬時亨教授等。為遷就康復出院無耐嘅燊哥，中央財經大學更破格到香港上環信德中心舉行榮銜頒授儀式。
尋日頒授儀式簡單而隆重，燊哥精神好好，反應又佳，仲不改一貫風趣幽默嘅作風，當見到老友方潤華代表大家發表講話時，向來能言善辯嘅燊哥就問身邊嘅人：「點解唔搵我講嘢？」大部分獲頒榮銜嘅名人都有親人撐場，好似郭炳湘有太太李天穎、方潤華有兒子方文雄、馬時亨就有太太王培琪等。
中央財經大學已有六十年歷史，素有「中國財經管理專家的搖籃」美譽，充分發揮國家部委和地方政府決策智囊團，所以被該大學挑選做顧問，一啲都唔簡單。