政情：彭清華勤打乒乓波強身
政改問題最近沸沸揚揚，中聯辦主任彭清華一定好忙，不過佢精神一直都咁好，頭髮烏黑程度同副主任李剛不遑多讓。李剛平日食冬蟲草保健強身，但係彭主任尋日同我哋講，佢靠打乒乓球鍛煉身體，仲約記者得閒ＰＫ吓添。
尋日出席新界社團聯會廿五周年會慶，我哋問彭主任有冇一如李剛一樣有食蟲草嘅習慣，佢話佢向來無特別保養或者食保健食品，不過佢話佢保持樂觀心境，作息有序，人就自然健康有神采，如果撞啱有時間，佢仲會打番場乒乓波出身汗鍛煉身體。
彭主任仲話有機會都想搵埋記者「ＰＫ」番一場添。「ＰＫ」發音同粗口諧音有啲近似，彭主任話佢唔知「ＰＫ」喺香港係粗口，呢個簡稱喺內地好受歡迎，因為佢有對決、比試嘅意思，相當正面，不過依家知道「ＰＫ」喺香港有第二個意思，所以以後會小心啲用。
同場仲有自由黨主席劉健儀同之前搶官員咪嘅自由黨西貢區議員方國珊（哪吒），劉健儀早前對哪吒冇問過個黨就咁落力撐政府有微言，不過尋日兩人碰頭反而冇再提，哪吒話佢有個助理嗰日混亂中懷疑受傷，劉健儀仲叫哪吒畀佢放假添。