政情：添馬艦拋錨徵藝術品冇人騷

為咗選出合適同有質素嘅作品，政府喺四月展開咗「添馬艦公眾藝術計劃」，邀請各界提交作品，呢個計劃今個月廿八日就會結束，結果到咗尋日，只係收到兩件藝術品。係呀，大家冇睇錯，只係得兩件參賽作品。主辦單位知道事態嚴重，尋日特登安排兩位評審委員會委員，包括添馬艦發展工程建築師嚴迅奇，同埋香港藝術館總館長鄧海超出嚟催谷一下，希望力挽狂瀾，吸引多啲本土藝術工作者參賽。

立會新大樓亦乏人問津

其實距離截止日期仲有唔夠廿日，主辦單位應該有晒心理準備個計劃會難產，雖然係咁，兩位評審仍然戮力推銷，鄧館長一開波就話一件成功嘅藝術品絕對可以成為香港地標，而且今次比賽製作費有成一百萬元，希望本土藝術工作者積極參與咁話。至於嚴迅奇更犀利，話評委只會從藝術角度去評審作品，即使件藝術品有政治意涵都完全冇問題，唔通為咗湊夠數真係乜都肯制？問到兩位委員覺唔覺反應好差，嚴迅奇笑住咁話仲未到期，依家仲未可以下定論。

話分兩頭，其實立法會依家都為新大樓籌集緊藝術品，佢哋截止日期又係六月廿八日，預算徵集最少十二個作品，預算製作費就由一百萬至二百五十萬不等，但咁啱又只係得兩個報名喎。反應咁冷淡，到底係因為香港人唔熱衷藝術創作，定係宣傳唔夠呢？睇呢兩個計劃搞成咁，實在令人好擔心西九龍文娛藝術區呢隻獲撥款二百一十六億嘅大白象將來會變成點。香港唔通真係文化沙漠，人造雨都揸唔出一滴水？