中環耳目：周松崗愛吃Nino's葡式燒乳豬
早前香港總商會舉行正、副主席改選，港鐵行政總裁周松崗以大熱之態當選常務副主席，按照傳統，如無意外下一任主席非佢莫屬，卓妮見周Sir喜上眉梢，話題一轉講到食嘢，周Sir話佢最鍾意葡國餐廳Nino's Cozinha，至愛佢哋嘅葡式燒乳豬、葡國腸同埋馬介休球，仲翹起大拇指添！
周Sir推介嘅Nino's位於灣仔QRE Plaza，係好多名人推介嘅正宗葡國餐廳。周Sir話，間餐廳原本喺灣仔船街，當時佢已成日去幫襯。佢話以前想食葡國菜就要過澳門，今時今日唔使咁頻撲嘞！講到至愛菜式，周Sir一開口就講唔停，有葡國乳豬、葡國雞、葡國腸同埋馬介休球等。
地道煮法皮脆肉滑
Nino's主打家庭式葡國菜，老闆有葡國血統。佢哋嘅食材大部分都由葡國入口，周Sir推介嘅葡式燒乳豬係最受歡迎嘅菜式之一。
佢哋首先選用重約十磅嘅乳豬，再採用里斯本地道煮法炮製，即先以蒜蓉同埋番茄等醃香後風乾兩日再燒，食落外皮薄脆、肉質軟滑，令人回味無窮。