中環出更：余鵬春戴Brooks Brothers絲質呔
國貨公司喺香港買少見少，已經交由第二代以現代化管理嘅裕華國貨，至今八、九成貨品都係國貨，可謂係商場異數。裕華董事副總經理余鵬春日日同國貨打交道，但喺澳洲留過學嘅佢始終品味洋化，早前卓妮見佢佩戴美國老牌子Brooks Brothers嘅絲質斜紋領呔，顯得佢斯文穩重。
卓妮喺香港總商會嘅活動度見到呢位國貨公司第二代，梗要問佢係咪國貨迷。不過余鵬春笑住話，佢唔係着裕華賣嘅國貨，條呔係Brooks Brothers。
Brooks Brothers一八一八年喺紐約創立，係美國最老嘅服裝品牌之一，好多美國經典人物都係捧場客，總統級嘅就有林肯、甘迺迪、克林頓等。牌子至今依然受到好多名流追捧，好似日本「萬人迷」木村拓哉、歌星Eason陳奕迅等。
余鵬春係裕華董事長余國春嘅細佬，兩兄弟一齊喺澳洲求學，感情十分深厚。佢哋用西方管理哲學管理裕華，希望洗脫國貨等於老土嘅刻板印象。