政情：張建東自嘲「庸」貌
政府情商行政會議非官守成員粉墨登場拍政改宣傳廣告，但只有三位成員參與，其他非官守成員去晒邊呢？無在廣告出現嘅行會召集人梁振英（CY）及成員張建東（Marvin）尋日去完中國會食飯後就對拍廣告一事各有解說，CY話無獲政府邀請，Marvin就話開拍期間佢咁啱身在英國開會喎。
政府冇搵CY拍廣告
CY同Marvin步出中國會時氣勢懾人，照計兩位高頭大馬嘅山東人出鏡拍政改宣傳廣告應該無難度至係，但點解唔拍呢？Marvin笑笑口話：「因為我唔夠靚仔嘛！」相信Marvin都係講笑啫，實情係廣告拍攝期間，佢以滙控獨立非執董身份到英國開董事會，回港後睇電視先知道政府拍咗輯政改廣告。
如果再有出鏡機會又點呢？Marvin婉轉拒絕話：「我唔擅長出鏡，都係搵口齒伶俐嘅人拍會最好。」至於CY就一於無有怕，只係政府一直無搵過佢拍政改廣告，如果搵到佢一定應承，依家只好隨時候命喎！