政情：阿松讚小伏持家120分
前財政司司長梁錦松同跳水王后太太伏明霞婚後經常有影皆雙，前晚小伏獲頒「成功女性」獎項，阿松都陪住太座參加頒獎晚宴，又公開讚揚太太將三個仔女湊得好好，佢畀一百二十分。小伏聞言甜絲絲咁話，雖然湊仔好辛苦，但見佢哋活潑健康已經好開心。
小伏婚後幫阿松生咗三個仔女，而且疊埋心水喺屋企做全職賢妻良母，抵老公咁錫佢。我哋問阿松想唔想追多個，阿松笑謂三個夠晒數嘞！咁又會唔會期望小朋友好似太太咁，成為出色嘅運動員？佢話運動員的確係個好職業，但佢唔希望小朋友同媽咪比較，咁樣好唔公平。佢希望小朋友畀心機讀書，將來做自己喜歡嘅事就得啦！
桑蘭自爆出自傳
當晚中國前體操運動員桑蘭都以嘉賓身份出席晚宴，佢專程由北京來港，睇嚟精神唔錯，仲自爆會寫自傳，講述自己十二年前受傷後嘅心路歷程。因一次表演失手，令桑蘭由人生高峰跌至谷底，但佢一路都好堅強咁面對，珍惜生命嘅精神好值得「港孩」學習。