政情：校園做騷鬍鬚曾拋錨

財政司司長曾俊華尋日又落水受訓喇。鬍鬚曾上星期六同市民對望兩分鐘口啞啞，佢尋日又落中學硬銷政改，不過佢功課做唔足，面對學生同老師嘅反對聲音支吾以對，仲鬧出干預學生發問疑雲添。

尋日鬍鬚曾以學校旅行形容政改，指每個同學想去嘅目的地都唔同，但唔可以因為有分歧而取消旅行。呢個比喻即刻畀教經濟科嘅翁志明老師寸爆，翁Sir高舉「超錯」標語厲聲反擊，話睇唔到政改嘅目的地，又指政府無辦法令市民安心接受中途方案，「如果決定去南非睇世界盃，但隻船起錨後途經索馬里會畀人騎劫，我寧願喺香港睇電視！」

鬍鬚曾之後又畀學生揶揄，學生話既然要精益求精，點解要好似政務司司長唐英年咁講，要捨Ａ取Ｂ呢？鬍鬚曾好似完全冇諗過會有咁尖銳嘅問題，惟有話自己讀書時「有Ｄ都好開心」，學生不約而同，還以不屑嘅眼神。

反應差都算，連政改方案嘅基本資料都唔熟書先抵打！有同學問鬍鬚曾點爭取足夠立法會議員支持，佢話政府會力爭每一票，但政改要有三分之二嘅議員贊成，即係「四十一票」先可以通過，所以好困難。爭取四十票已夠難，依家鬍鬚曾無情情要多一票，起錨運動提早冚旗算罷啦。

煲呔曾「超錯」賴議員

我哋尋日仲收到投訴，話鬍鬚曾要求學校早一日交學生問題畀佢睇，有事先審查之嫌，令部分知道問題已曝光嘅學生非常不滿，決定臨場轉問題。財政司司長辦公室承認有了解過學生會問乜問題，但就唔認干預，指過下目好正常。

明顯地鬍鬚曾今次「落水」繼續拋錨，但有真兄弟煲呔曾陪，煲呔曾見網民將「起錨」惡搞成「超錯」，決定死雞撐飯蓋，尋日喺facebook話超錯嘅係當年否決政改嘅議員，對一切批評，似乎都掩耳閉目唔理。依雙曾嘅資質同心態，要落多幾多次水至唔會浸死呢？難怪前全國人大常委曾憲梓都只係話佢哋嘅表現「見仁見智」，就知大家都唔係幾滿意。