中環耳目：王守業伉儷食烏冬一冷一熱
日本菜幾時都係香港人至愛嘅菜式之一，由超過二十年經驗嘅日本名廚柳田健二主理嘅港島香格里拉大酒店灘萬日本料理，食物質素同環境深得唔少名人青睞，好似大新金融主席王守業伉儷，每次仲會約埋一大班親朋好友一齊去分享。
灘萬設有三間私人貴賓廳，自成一角，所以向來鍾意私隱度高嘅王守業夫人每有親友生日，都會喺度慶祝，必點出名軟滑又夠彈牙嘅稻庭烏冬。向來係愛妻號嘅王生都愛稻庭烏冬，不過王太愛熱食，王生就愛凍食。至於懷石料理亦係王太嘅至愛，懷石料理將時令食材入饌，佢讚灘萬好細心，知佢唔食魚生，好多時都會幫佢轉用其他食材，令王太甚為欣賞。
灘萬嘅設計概念源自傳統「Sukiya」風格，崇尚天然。出生喺鹿兒島嘅主廚柳田健二，九七年加入灘萬位於日本帝國大飯店嘅分店，○四年開始擔任助理總廚。有次日本首相宴請包括前美國總統布殊等來自世界各地嘅元首，柳田都有份主理。