中環出更（二）：小吉推動陳家強日行萬步
自從有研究話每日行一萬步可彌補城市人運動量不足後，本港好多名人都響應行路當做運動，卓妮最近發現財經事務及庫務局局長陳家強都加入咗行路隊伍，每日目標行一萬步以保持身體健康。不過，一萬步唔係小數目，邊行邊數好易分心數錯，陳家強最近就獲全國政協委員方黃吉雯送贈小型電子計步器，準確計算及記錄每日行咗幾多步。
送電子計步器
卓妮早兩日喺一間餐廳巧遇陳家強，見佢攞住部類似MP3播放器喺度㩒㩒吓，細問下才知道原來係部小型電子計步器，部機顯示佢當日行咗一千二百九十二步，但距離一萬步仲有八千幾步。陳家強話，做局長時間緊迫，出入都用車，有時工作忙好難行足一萬步，惟有夜晚返屋企做gym（健身）跑track mill（跑步機）補夠數，不過好似呢個周日佢去咗打高爾夫球，喺偌大嘅球場行來行去，不知不覺就行咗萬幾步。
不過，無論每日能否達標都好，陳家強都感謝小吉送贈嘅電子計步器，成為佢勤力行路嘅推動力。其實好多政商界名人早已懂得行路健體，好似前環境運輸及工務局局長廖秀冬早喺○六年已提議立法會飲食界代表張宇人行路減肥，兩人仲試過喺午飯時間一齊由金鐘沿法院道行到中區政府總部，而即將過檔恒隆集團嘅陳南祿亦有鋪行路癮。
卓妮