中環出更（一）：曾智明望仔女童年快樂
富豪二代子女都爭入名校，金利來太子爺曾智明（Ricky）卻希望囡囡凱栭（Sheree）及囝囝浩儒（Tyrone）享受快樂童年，千挑萬選下，揀咗位於沙田石門、標榜全人教育嘅基督教國際學校（ICS）。但教會學校經費有限，Ricky尋日捐出五百萬元，資助學校興建戶外運動場，學生知道後開心到拍爛手掌。
曾憲梓欣賞世博科技
Ricky做善事，曾家全家出動主持捐贈儀式，爸爸曾憲梓、曾媽媽、歌星太太黎瑞恩（小恩子）、大哥曾智謀夫婦及二哥曾智雄（William）夫婦都嚟捧場。Ricky老友多，香港青聯主席陳仲尼、副主席葉振都、立法會議員林大輝都嚟恭賀，「草蜢」成員蘇志威同太太劉小慧就嚟捧小恩子場。
曾憲梓久未露面，原來去咗上海睇世博，三日內走勻中國同香港館。曾老話，展館嘅科技夠晒犀利喎。對於阿囝Ricky捐錢辦學，曾老都話好支持。Ricky強調，捐錢非為晒身家，只希望畀學生一個設施完善嘅運動場。
Ricky家住九龍塘，何解山長水遠送子女入沙田讀書？原來係小恩子嘅主意，佢盛讚ICS教學方法夠創意，老師教游水時出動救生艇做道具，大玩求生遊戲，令學生明白識游水嘅重要性，加上校風淳樸，同學之間唔會炫耀家世，令小恩子好放心。
小恩子笑咪咪話，讀緊小一嘅囡囡，返學後學會一口流利普通話，嚇咗佢一跳；快將升幼稚園高班嘅囝囝，似足媽咪一樣愛唱歌，英文更係嘞嘞聲。
Ricky有子萬事足，哥哥William都唔執輸，七月將榮升老竇。講到改名，William話最緊要夾八字，會等BB出咗世先改喎。
卓妮