中環出更：孫太帶孫仔買餸當上堂
教育局局長孫明揚太太鍾小芬一向倡議「住家飯」，認為每晚一家人樂也融融食餐飯，可以增進家人感情，難怪位於跑馬地菽園新臺嘅孫家大宅，每晚燈火通明，飯香撲鼻。唔講唔知，原來孫太每晚六點至九點要預備四輪餸菜每小時一輪，分別供應畀孫仔、細女、大女及孫公，仲有就係新抱，四餐之後仲要預備「外賣」飯餸畀女婿攞走。孫家咁多人食飯，究竟孫太點樣買餸嘅呢？
誰知盤中飧 粒粒皆辛苦
卓妮早幾日專程直擊孫太到灣仔鵝頸橋街市嘅買餸過程，咁啱當日佢細女孫葆文（Bonnie）陪媽媽買餸，仲帶埋愛兒呂家睿（Edgar）去街市見識吓。孫太第一項任務就係走到雜貨舖買米，買咗十斤上海珍珠米，每斤盛惠十蚊，呢隻米可用作煲粥同整壽司。孫太話鍾意呢隻米夠黏口。買米過程中，孫太趁機教外孫認識稻米種類，等佢知道「誰知盤中飧，粒粒皆辛苦」。
買完珍珠米，孫太帶Bonnie同Edgar去買牛腩，肉檔老闆早已預留四斤半爽腩肉及三斤牛孖筋畀孫太，爽腩肉每斤56蚊，牛孖筋每斤36蚊，合共盛惠360蚊。孫太教路，爽腩肉出水後要原塊同蘿蔔一齊炆，如果切碎咗炆就會無咁好味喎！之後孫太又買咗一條四斤四両嘅英倉魚，每斤110蚊，條魚大約467蚊。
咁大條倉魚，孫太話有兩種食法，魚頭連魚身切件香煎，魚尾就用嚟清蒸，屋企咁多人，各有所好。另外，孫太買咗啲排骨同豬膶，又買幾棵臭草煲紅豆沙，前後夾埋買咗差不多1000蚊，孫太話可以分到幾餐食喎。卓妮留意到，孫太買餸習慣唔講價，檔主話幾多就幾多，全憑一個「信」字。孫太話，如果發現貨不對辦，以後就唔會再幫襯。
買完餸後，孫太同Bonnie就帶Edgar到時代廣場一間書店買圖書，Edgar表現得好開心。小朋友行咗咁耐街市都無扭計，當然要獎勵吓啦！
卓妮