政情：徐英偉甜蜜夜遊超市
民政事務局局長政治助理徐英偉（Caspar）去年十月同女友Leslie拉埋天窗，唔經唔覺半年有多。Caspar話婚後兩口子搬咗去鰂魚涌住，純粹為方便喺銀行工作嘅太太。不過因為兩個都早出晚歸，平時惟有靠一齊去超市掃平貨同煮飯仔嚟維繫感情。
Leslie鍾意行山同睇音樂劇，與Caspar嘅工作範疇息息相關，難怪佢會趁周末放假同太太一齊去睇，順便寓工作於娛樂。至於平時要返工嘅日子，Caspar就忙於落區處理地區問題同埋出席地區活動，不時要做到夜晚十點幾先放工，所以同太太經常把握超市閂門前嘅減價時段去掃平貨，返到屋企再同太太煮飯仔。
依家佢哋兩個仲過緊愉快嘅二人生活，遲啲會唔會添多位家庭成員呢？Caspar話仲未有決定，不過佢已經向身邊為人父母嘅朋友取經，做足準備喎！