社民連三子自從○八年進身立法會後，掟蕉、掃枱、謾罵、講粗口，搞到議會無日安寧，畀人起咗個朵叫「丐幫」。自從佢哋喺今年一月辭職搞變相公投後，立法會即時安靜晒；不過呢啲「安樂日子」即將完結，因為三人將於今日再次宣誓就職，重返立法會。
立法會尋日安排公社兩黨五名剛當選議員預習宣誓，黃毓民同上次一樣標奇立異用普通話宣誓，大舊陳偉業仲擅自更改誓詞話：「本人定當擁護……吧吧吧吧，盡忠職守，掟蕉掃場……」事後二人異口同聲話，今日唔打算喺宣誓途中生事，但宣誓完畢後會好好「招呼」在座嘅官員。
公社兩黨議員辭職當日，五名議員都準備咗演辭，點知建制派突然拉隊離場，最終流會收場，搞到五人發言不成。毓民同大舊尋日挑釁話，建制派既然唔認同佢哋行為，就應該喺佢哋今日宣誓時再次拉隊離場。大舊揚言會將「五區公投」期間發生嘅事做報告，話會交畀聯合國人權委員會。
社民連諗住搞寸立法會，工聯會王國興話由得佢哋，佢已經冇眼睇，今日決定喺五人宣誓時離開議事堂，但建制派方面就冇傾過對策喎。