政情：蔡冠深送子北上「捱苦」
內地經濟騰飛，北上做暑期實習，係大勢所趨，不過學生哥銀両有限，中華總商會會長蔡冠深尋日宣布以商會名義捐出一百六十萬元，資助逾五百二十位大專生去內地實習交流。佢都送咗大仔去瀋陽一間企業做實習生，等佢捱吓苦。
獲資助嘅大學生來自九家大學，實習計劃多姿多采，有法律生去上海、南京兩地法院實習；亦有護理系學生去廣東省中醫院臨床部做交流。蔡冠深話，香港學生雖然醒目，但缺乏內地人事脈絡，將來北上發展好蝕底。
蔡會長都將大仔送咗去瀋陽打暑期工，囝囝依家喺加拿大讀緊大學。蔡會長話，阿仔返工無特權，連送信畀部長都要做埋。咁做其實有苦心嘅，蔡會長話，北京、上海等大城市繁榮如香港，二線城市反而商機處處。梗係喇，蔡會長係已故漁業大王蔡繼有嘅接班人，蔡家嘅新華集團喺瀋陽扎根二十年，早前更斥資二十餘億元投建瀋陽國際金融中心，囝囝喺瀋陽打工，將來大可幫手打理家族生意。