終極普選聯盟有望喺短期內首次同中央官員會面討論政改，幫過普選聯做傳信人嘅全國人大常委范徐麗泰尋日好欣慰話，如果會面成事，就係一次破冰之旅，直接溝通有助雙方理解各自嘅困難同挑戰，而且溝通有咗第一次，就可能有第二次。不過佢亦提醒大家話，破冰之旅不一定捉到魚，兩方面傾偈、交流，無話一定會有成果或共識，總之就係為即將舉行嘅會面降溫。